Cebu City – Gipaserhan sa kagamhanan sa dakbayan sa Sugbo ang tindahan sa sapatos sa Brgy. Lahug nga nag-sale hinungdang gipunsisokan sa mga tawo gahapon sa buntag.
Si Konsehal Joel Garganera, pangu sa EOC o Emergency Operations Center, miangkon nga ang nagdasok nga mga tawo nga nagpaabot nga mangabli ang tindahan dayag nga nakalapas sa health protocols.
Base sa pamahayag sa mga netizens nga nakaagi sa lugar, taas na kaayo ang linya sa mga tawo nianang alas 7 pasado sa buntag nga miabot na sa Gorordo Avenue ug wa na matuman ang social distancing policy.
Pero ang pakisusi sa kapolisan nagbutyag nga alas 3 pa sa kaadlawon naglaray na ang mga tawo.
Midugang si Garganera nga ang ilang gibuhat mao ang pagpakiglambigit sa City Admin ug sa Business Permit Section ug nahukman ang pagpatak-op sa tindahan.
Suma pa sa kagamhanang local, nakalapas ang tindahan sa Executive Order nga naglatid sa social distancing protocols sa mga dapit publiko ug napakyas usab pagkuha og business permit, ug pagtugot gikan sa DTI sa pagpasiugda sa sale ug ubang promotional events.
(Jhon Tadlip/JTY, photo courtesy by Ramil Ayuman)
(Source: Cebu City Emergency Operations Center( EOC))
