Cebu City – Mikabat sa 169 ka establisimento nga pangturismo sa lalawigan sa Sugbo ang gitugotan pagbukas ubos sa MGCQ o modified general community quarantine.
Base sa listahan nga gipagawas sa PTO o Provincial Tourism Office niadtong Lunes, 23 ka lungsod ug duha ka siyudad ang mahimo nang modawat og turista nunot sa pagpangabli sa mga establisimento sama sa kan-anan, beach resort ug uban pa.
Ang 23 ka lungsod gilangkoban sa Alcoy, Aloguinsan, Argao, Badian, Balamban, Bantayan, Barili, Boljoon, Carmen, Catmon, Compostela, Cordova, Dalaguete, Liloan, Medellin, Minglanilla, Moalboal, Oslob, Pinamungajan, San Remigio, Santa Fe, Santander ug Sogod samtang ang duha ka siyudad mao ang Carcar ug Danao.
Ang nahisgotang mga lungsod ug dakbayan nakapasar sa inspeksyon nga gihimo sa PTTF o Provincial Tourism Task Force.
Gipahigayon ang pagsiksik aron pagseguro nga mosubay sa quarantine ug health protocol ang tanang suroyanan para makalikay sa coronavirus disease o Covid-19.
Segun sa record, ang lalawigan sa Sugbo nagbaton og 44 ka lungsod ug unom ka siyudad busa labaw na sa katunga ang naghinay-hinay pagbalik sa panginabuhi sa turismo ug negosyo. (Jhon Tadlip/JTY, photo courtesy by Sidlak Danao-Jaypee Motovlog | Basdako Moalboal-Jepoi Lazaro | Hidden Valley Pinamungahan- Lai | Kawasan Falls Badian-Roger Oliveira)
(Source: Cebu Provincial Tourism Office)