Cebu City- Nagsugod na pagtamod sa time-based discharge policy sa mga pasyente sa coronavirus disease o COVID-19 ang lalawigan sa Sugbo.
Sumala pa ni Gob. Gwendolyn Garcia, iya nang gipangayo ang pagtugot ni Direktor Jaime Bernadas sa Department of Health o DOH-7 pagtakli sa time-based policy sa pagpagawas sa ospital o isolation facility sa mga pasyente sa COVID-19.
Hangtod sa miaging adlaw, matod ni Garcia, ang ubang pinireso sa CPDRC o Cebu Provincial Detention & Rehabilitation Center nga walay mga sintoma nalakip sa 87 ka total recoveries sa probinsiya.
Matod ni Garcia, nagsugod na sila sa maong sistema ug ang mga binilanggo sa CPDRC nahibawo siya kanus-a kini gi-test ug ang uban kanila wala pa mahibalik ang resulta.
Ang nahisgotang mga pasyente walay gipakitang timailhan sa virus busa di na kini mistil ipa-swab test pag-usab.
Ubos sa time-based discharge policy, ang pasyente nga makitang wala magluya sulod sa 21 ka adlaw gikan sa pagkapositibo sa Covid 19 mahimo nang pagawson bisag wala pay resulta sa polymerase chain reaction o PCR test.
Gipasabot ni Garcia nga ang pag-shift sa time-based discharge policy makatabang usab pag-maximize sa limitadong test kits ug tutokan na lang kadtong adunay mga sintomas.