Gibutyag ni Doctor Arvin Alejandro, ang provincial health officer ug incident commander sa gimugna nga ICS kon Incident Command System batok Coronavirus, nga gipatuman sa matag munisipyo sa Sarangani Province ang “tightened border lockdown.” Kahibaluan nga hangtud ning tungura nag-inusara na lang ang Sarangani sa entiro Rehiyon Dose nga wala pay natala nga kumpirmadong naigo sa Coronavirus. Sa kini nga gipahugtan nga border lockdown, dili lang regional lockdown ang padayong ipatuman kundili ang border lockdown sa matag lungsod. Gibawalan ang pagsulod-gawas sa usa ka munisipyo kung dili man lang essential o emergency ang lakaw hilabi na ang paadto ug pabalik sa Gensan.
Dili lang pud matugaw ang suplay sa pagkaon. Apil sa border lockdown ang pagdili nga makaagi sa Sarangani Bay ug Celebes Sea, maong anaa nakabantay ang Philippine Coast Guard, Philippine Navy ug PNP Maritime. Ang tugutan nga makahawa ug makabalik sa ilang munisipyo nga walay dalang sintomas ang i-konsidera nga PUM ug mupailalum sa mandatory quarantine sulod sa katorse (14) ka adlaw.
Samtang, madugangan karong semanaha ang ayudang pinansyal gikan sa Provincial Government sa Sarangani gumikan mutunol napud og Dos Milyones ka pesos (P2M) matag munisipyo si Governor Steve Chiongbian Solon kauban sila Vice Governor Elmer De Peralta ug tanang board member, P14 Milyones ka pesos alang sa pito ka lungsod. Nadawat na sa mga mayor ang pasiuna nga Syete Milyones ka pesos (P7M), Usa ka Milyon (P1M) kada munisipyo. Ug karong semanaha human sa session, laing Dos Milyones na usab ang mahatag, mahulog nga Tres Milyones ka pesos (P3M) ang madawat matag munisipyo pang-ayuda sa mga panginahanglanon sa mga tao sa kabarangayan. Madugangan pa ang maong mga pondo sama sa gi-promisa ni Governor Solon kung magdugay pa ang ipatuman nga mga lockdown.