Giturn-over sa “Tourism Infrastructure and Enterprise Zone Authority” (TIEZA) pinaagi ni Engr. Joselito J. Aure, ang Project Engineer sa nasangpit nga ahensiya, ngadto sa kagamhanang lokal sa Dipolog ang dul-an sa Php5M nga balor sa proyekto didto sa Brgy. Cogon ning dakbayan.
Ang nahisgutan nga proyekto mao ang Development of Cogon Eco-Tourism Park nga usa sa mga “tourist destination” dinhi sa dakbayan.
Nasayran gikan ni Engr. Aure nga ang gibutang nga mga imprastraktura mao ang 2 units Picnic Shed, Elevated Water Tank nga mosulod og 600 ka galon nga tubig, Steel Street Signage, 375m. nga Open Canal alang sa flood control, Electrical Works ug 2 Units Comfort Room nga gender sensitive-designed nga gibutang duol sa camping area.
Mainitong gidawat ni Mayor Darel Dexter T. Uy ang proyekto gikan sa TIEZA didto sa iyang buhatan kaganinang buntag, Septiyembre 24 ning tuiga.
Ang TIEZA, usa ka korporasyon nga gipanag-iyahan og gikontrolar sa gobyerno nga naka- attach sa Department of Tourism og namugna pinaagi sa Akta Republika 9593 o nailang Tourism Act of 2009. Kini maoy responsable dinha sa pag-implementar sa mga palisiya ug programa sa DOT nga dunay kalabotan sa development, promotion lakip na ang superbisyon niini.
Mitambong atol sa turn-over ceremony mao si Mayor Darel Uy, Engr. Aure, City Tourism Officer, Cecil Bilog ug personahe gikan sa City Engineering Office tanan ning dkbayan.
(Source: DIPOLOG CITY GOVERNMENT Facebook page)