Tungod sa hulga sa African Swine Fever (ASF) ug pagtala sa labing unang mga kaso nga nakasulod sa lalawigan nagpakanaog gilayon si Gobernador Bambi Emano og kamanduan pinaagi sa usa ka Executive Order aron temporaryong idili ang bisan unsang kalihokan ug pagbiyahe sa mga binuhing baboy ug processed pork meat labina kung kini gikan sa mga backyard farm sulod sa lalawigan sa Misamis Oriental.
Sa gipirmahan niini nga Executive Order No. 003 Series of 2021, tugutan lamang ang mga negosyante sa baboy ug karneng baboy nga magbiyahe kung kini adunay balido nga Veterinary Health Certificate, gibyahe gamit ang Bureau of Animal Industry – Accredited Livestock Transport Vehicle, anaay Bureau of Animal Industry Handler and Transport Carrier License, ug uban pang mga gikinahanglan dokumento gikan sa Bureau of Animal Industry.
Subay niini, gimandoan usab ang tanang Local Chief Executives sa lalawigan nga magtukod og mga kaugalingon nga mga Animal Quarantine Checkpoints sa ilang mga utlanan sa laraw nga panalipdan ang ilang mga lugar batok sa ASF.
Kung gi-unsa sa lalawigan ang pakigbatok sa Covid-19 mao sab ang hugot nga gihimo aron dili na mokaylap ang ASF hinungdan subli nga gihangyo ni Gobernador Bambi ang kooperasyon ug tabang sa katawhan sa lalawigan aron mapugngan nga mukaylap sa laing pang bahin sa Misamis Oriental ang ASF. (Public Information Office)Â