Un tattoo artist ya muri anoche na un incidente de tiro na calle Veterans Avenue, Barangay Camino Nuevo, este ciudad.
Asegun con Coronel Alexander Lorenzo, Zamboanga City Police Office (ZCPO) director, con el victima ya conose como si Carl Edward Gonzales, treynta años el edad y residente de Barangay Tumaga, este ciudad.
El incidente ya ocuri maga alas nueve sincuenta’y tres Domingo denoche na Calle Veterans Avenue.
Asegun con Lorenzo cay base na investigacion, ta maneja si Gonzales motorsiclo cuando ya tira con el victima el un desconosido persona kien ta maneja tamen un motrosiclo.
Con Gonzales enseguidas ya lleva na hospital pero ya rebenta su resuello maga alas dies dies del noche myentras bajo el curada medical.
Asegun con Lorenzo ya puede maga personajes del Scene of the Crime Operatives (SOCO) ya recubri cuatro capsula de calibre cuatenta’y sinco pistola na lugar del crimen.
Si Lorenzo ya habla cay el ZCPO’s Police Station 11 ta continua el investigacion para sabe si cosa el motivo y si kien el suspechao na incidente. (B. Garcia)