Davao City – Mas gipakusgan ug mas gipalig-on pa sa Task Force Davao ang ilang pakiglambigit ngadto sa uban pang mga security sector nunot sa gipagawas nga warning sa Japan Foreign Ministry labot sa posibleng teroristang pagpangataki sa Southeast Asia, partikular sa Pilipinas, Indonesia, Singapore, Malaysia, Thailand ug Myanmar.
Gipamahayag ni Col. Darren Comia, Task Force Davao Commander nga nakiglambigit sila sa tanang intelligence agencies subay sa padayon nga pag-validate sa impormasyon nga gipagawas sa nasud Japan. Dugang ni Col. Comia nga 24/7 sila nga nagpahigayon ug closed coordination sa ubang security forces dili lamang dinhi sa dakbayan sa dabaw apan lakip na sa gawas sa siyudad.
Ang tanang madawat nga mga reports sa Task Force Davao wala nila gipasagdan ug hinuon ilang gi-seryuso kini ilabi na ang dunay kalabutan sa seguridad. Mas gipalig-on pa sa kasundaluhan ang checkpoint operations ug information gathering aron masiguro nga walay makalusot nga mga terorista dinhi sa dakbayan sa dabaw. Dugang gipamahayag ni Col. Comia nga pabailing generally peaceful ug walay direkta’ng hulga nga na-monitor dinhi sa siyudad.
(Source: Task Force Davao)