Cebu City- Usa ka semana sa dili pa ang labing dakong relihiyoso ug kulturanhong kasaulogan sa Sugbo karong Enero 17, 2021, naka hukom ang Sinulog Foundation Inc. (SFI) ug ang steering committee sa Sinulog 2021 Festival pagkansela sa tanang kalihukan labot sa Sinulog Ritual Showdown.
Kini nagpasabot nga dili na ipadayon ang alternatibong lakang sa pre-recorded performances broadcast diha sa social media.
Gipahibaw ni Cebu City Vice Mayor Michael Rama, overseer sa Sinulog 2021, nga ilaha na lang ipa kita sa social media sites ang mga past performances sa mga mingdaug kaniadto.
Tinguha niini aron luwas ang publiko nga motan-aw diha sa ilang tagsa tagsa ka panimalay.
Subay sa ila (SFI) nang unang mga gipamahayag,labing una niining gi konsidera mao ang health ug safety sa katawhang Sugboanon.
Hinoon,ang performances sa mga contingents plano nilang presenta atol sa Quincentennial Anniversary of the Arrival of Christianity karong Abril 2021.
Sa iyang bahin, gipasabot ni Neil Odchigue sakop sa steering Committee nga ilahang gi-atras ang ritual competition tungod sa nagsaka nga mga kaso ug isip pagpaminaw sa panawagan sa publiko.
Sa Department of Health Central Visayas Covid-19 Case Bulletin no. 205, ang Syudad sa Sugbo dunay 54 ka mga bag-ong kaso ug sa kinatibuk-an mi-abot na ug 331 ka mga kaso;
Dunay 22 ka mga bag-ong kaso sa lalawigan sa Sugbo, 12 sa Mandaue ug 10 sa Lapu-Lapu.
Gimanduan na ang mga contingents nga ipahunong ang mga rehearsals sa kasamtangan hangtud nga dunay makab-ot nga kasabotan ngadto sa Archdiocese sa Sugbo labot sa ilang (contingents) pag perform atol sa Quincentennial Celebrations.
via Jhon Tadlip
Source: Sinulog Foundation Inc. | DOH-7