Determinado ang Environment Management Bureau o EMB-7 pagsera sa tanang open dumpsites sa rehiyon sa dili pa moabot ang buwan sa Marso ning tuiga agig sanong sa mando ni Kalihim Roy Cimatu sa DENR.
Gihimug-atan ni Cimatu ang panginahanglan sa pagtak-op sa tanang bukas-nga-labayanan-og-basura sa nasod subay sa Republic Act 9003 o ang Ecological Solid Waste Management Act of 2000 atol sa ika-20 nga anibersaryo sa Negros Oriental niadtong Enero 26 nga iyang gitambongan.
Base sa statement, ang DENR-7 nagpasidaan sa mga kagamhanang local sa rehiyon nga nagpadayon pagpadagan og open dumpsites labot sa issuance sa cease and desist order.
Sa sayo pa, giisyohan sa EMB-7 og cease and desist order ang mga lungsod sa Carmen, Cebu ug Guindulman, Bohol sa pag-operate og open dumpsites.
Sa samang higayon, padayong nakiglambigit ang EMB-7 sa ubang mga LGUs sa Negros Oriental pinaagi sa pagpasiugda sa “Capacity Development on Environmental Laws and LGUs’ Compliance to RA 9003” nga usa ka kutay sa mga forum nga natapos sa miaging adlaw.
Atol sa maong seminar, gipresentar ang gitawag og financial mechanism schemes sa mga representante sa mga LGUs aron paghatag og ideya kon unsaon pag-establisar sa solid waste management facilities. l via Jhon Tadlip/JTY
Source/Photo: Environment Management Bureau-7