CAGAYAN DE ORO CITY- Ang life-sized nga imahen sa Itom nga Nazareno ang ipagawas gikan sa Nazareno Parish Church alang sa usa ka motorkada libot sa nag-unang kadalanan inay nga himuon ang naandang procession ug kini lamang ang religious event nga gitugutan dinhi sa dakbayan sa Cagayan de Oro alang sa Semana Santa samtang ang atong nasud nakigbisog batok sa coronavirus pandemic. Mao kini ang gisugilon ni Monsignor Rey Monsanto sa Cagayan de Oro Archdiocese diin siya mibutyag nga ang maong imahe pagadalhon sa itom nga sakyanan ug iparada libot sa syudad.
Usa ka pari ang mosakay sa maong sakyanan ug mohatag sa pagbendeta sa mga deboto diha sa ilang panimalay samtang kini nagdagan. Gipasabot ni Monsanto nga ang nahisgutang motorkada susama sa gihimo sa Cebu diin gigawas palibot sa nag-unang kadalanan sa sugbo ang imahen sa Santo Nino aron sa pagpangayog intervensyon sa Ginoo sa pagpahunong na sa Covid-19 pandemic.
Nasayran nga ang maong kalihokan gisangon sa local nga kagamhanan aron masiguro nga ang katawhan nagpabilin lamang sa ilang panimalay samtang molabay ang motorkada.
Walay laing religious event atol sa Semana Santa gawas lamang sa motorkada sa Black Nazarene. Una na niini nga gimanduan sa local nga mga opisyal ang pagpasira sa tanang religious sites atol sa Holy Week aron kapugngan ang pagdagsa sa mga deboto.
