Pagadian City – Sikop na ang suspek sa pagpatay kay Christy Ayuman, ang babaye nga nakaplagan nga wala nay kinabuhi sa Banale, Pagadian city kaganiha, alas 6 sa buntag.
Ang suspek ang giila sa alyas nga Dodong Bulanon kinsa kasamtangang giintirugar karon sa Pagadian city police station ug gapadayon ang imbestigasyon sa kapulisan aron pagtan aw sa mga anggulo.
Apan sa pakighinabi sa media local ngadto sa suspek, Hugtanong gipanghinakak niini nga siya ang responsable sa maong krimen. Matud pa niya nga wala syay kalibutan sa nahitabo kay Ayuman gani nakuyawan sab siya sa balita ug gikatingad.an na lamang nya nga siya ang gitudlo nga suspek. Giangkon usab niya nga duna silay lalis daan ning biktima parte sa negosyo nga food package ug Paluwagan, apan wala man silay dumot. Lamang, dunay mga ebidensya nga magtudlo gayod kaniya nga salaod sa krimen.
Nasayran nga niini lamang buntag, natugaw ang social media sa balita nga usa ka babaye ang nakaplagang patay sa dakbayan.
Giila sa mismong pamilya ang biktima nga si Christy Ayuman, 29 anyos, adunay ka live-in, ug lumulopyo sa Purok Hillside, Barangay Nazareth Pagadian City. Gikanayon nga usa kini ka negosyante ug ahente sa online sabong.
Sa pag responde sa kapulisan sa lugar hitabuan, Ang biktima ang nakaplagan na lamang nga gatuy-od sa kasagbutan, walis na ang bisti ug wala nay kinabuhi. Base sa gipahigayon nga mortem examination sa city health office ug City disaster Risk reduction management office sa pagpangulo ni Richard Fabria, nasayran nga bun-og sa nawong ug uban pang parte sa lawas ug samad sa ulo ang hinungdan sa kamatayon niini.
Matud pa sa pamilya niini, kagahapon sa buntag Agosto 2 2021, milakaw ang biktima sakay ang sa single motor, XRM kolor itum ug sukad nianang mga orasa, di na kini makontak. Apan sa pag rekober sa lawas sa biktima, wala na usab ang motor nga niini.
Gidala na sa punerarya ang patayng lawas sa biktima ug ning mga orasa, balhog na ang suspek ug magpabiling spekulasyon ang pagkalambigit niini sa kremin hangtud di mapamatud-an.
(Nessah Abiso, photo courtesy of Pagadian news icon | Diocsil Sanico, RPN DXKP Pagadian OIC)