Nadakpan sa gihimong follow up operation sa mga tinugyanan sa kapulisan an 23 anyos nga layaki nga si Mico Jhon Ligas Salinas, residente sa Purok 1-A, Brgy. San Juan, SC sa alas 12:30 nan hapon kagahapong adlawa human ija gikawat an cellphone sa biktimang si John Lawrence Gupid Fermilan, 20 anyos, college student, residente sa Narciso-Rosales St., Brgy. Taft, SC.
Basi sa imbestigasyon ni PCL Andres Felisco Jr. ngadto na sa biktima nasayran mga alas 11:30 sa buntag kagahapong adlawa, an biktima midangop ug nagpakitabang sa kapulisan ug gisaysay niini mga alas 5:00 sa buntag kagahapon samtang natuyog sa suyod an biktima sa tricycle nga gi.parking kilid sa karsada sa Purok 1-A, Brgy. San Juan, nabulabog ija tuyog human may layaki nga waya makilay.i an ngayan apan nailhan an nawong an mikuha nan itom nga Techno 5G nga cellphone sa kantidad P15, 000 pesos gikan sa ija bulsa ug ni jagan pasingod sa waya matino nga direksiyon.
Human misumbong an biktima, an mga personahe sa Intelligence Operatives sa pagpanguna ni PEMSgt. Von Michael Vijar nagpakita ug hulagway sa biktima sa mga iladong tulisan sa syudad. Gipunting sa biktima an hulagway ni Mico John Ligas Salinas, alyas kiroy.
Nagpahigayon nan hot pursuit operation an mga intelligence operatives nga miresulta sa pagkasikop sa suspek. Sa pagka kuman an nadakpang suspek an jaon sa kustodiya sa Surigao. (Mark James Lisondra)