Nagmalampuson nadakpan an Provincial Top Most Wanted Person sa Surigao del Norte gumikan sa kasong gi.atubang nga rape pinaagi na sa joint operation sa Alegria MPS isip lead unit kaiban an Provincial Intelligence Unit personnel, Intel Packet sa Precision Immobilization Technique SDN ug Regional Intelligence Unit 13.
Sa report nga gipagawas ni PCOL Laudemer M. Laude giila an akusado nga 64 anyos, layaki, menyo, residente sa Alegria, SDN.
An akusado an may Warrant of Arrest sa kasong Rape ubos sa Revised Penal Code 266-A nga may criminal case no. 17457 nga gi.isyu sa Regional Trial Court, 10 Judicial Region, Branch 29, SC nga may docket no. ug pinetsahan Mayo 6, 2024 nga may girekomendar nga piyansa sa kantidad P120, 000 ka pesos.
Base sa imbestigasyon sa Alegria Municipal Police Station, nahimo sa suspek an krimen jadton Disyembre 3, 2023, pinaagi sa pagbiktima sa 11 anyos nga menor de edad nga estudyante sa Barangay Ombong, lungsod sa Alegria.
An suspek silingan ra sa biktima, ug gidaya kini sa bayay sa suspek ug malisyosong gilugos ug gihulga an biktima.
Giawhag ni PCOL Laude nga an tanang nakasaya sa balaod nga jaoy mga warrant nga mosurender nga malinawon ug mokooperar sa mga awtoridad. Sa pagka kuman an akusado an jaon sa kustodiya sa Alegria MPS. (Mark James Lisondra)