Tagpabuto na sa Provincial Explosive Ordnance Disposal and Canine Unit 13 SDN PECU an luggage na tagbilin sa Luneta Park. Kini human tag-ingkuran nan bomb sniffing dog ang maong bagahe na wayay nag claim.
Sa nakuhang impormasyon nan RPN DXKS Surigao gikan sa kapulisan sa syudad, nakadawat sila nan tawag na jaoy bag na green sanan itom na backpack tagbilin sa ingkuranan sa Luneta Park atbang sa parking area sanan atbang sa BDO One Network Bank. Kini nadeskobrehan alas 8:16 sa buntag.
Alas 9:35 tag cordon na ang area sa pagpangulo ni Police Lieutenant Joel P. Mancia iban an Explosive Detection Dog ug miingkod ini tupad sa bag nga nagpasabot na jaoy ingredient sa bomba or posibleng bomba.
Taghiktan sa EOD personnel an bag ug tagbira sa luwas na area na wayay malagsikan dapit sa semi-circle na ingkuranan sa Luneta ug tagpabuto alas 10:45 sa buntag.
Human sa inspection, nakita na may posporo, lima ka tshirt, 3 kapantalon ug duha ka brief nan layaki sanan isa ka malong an suyod sa bag ug wayay mga timailhan na jaoy bomba sa suyod niini. (RPN DXKS Surigao)