Didto na sab tag daya ang mga libreng serbisyo sa Brgy. Serna jadton Marso 19, 2024.
Nahuman na malampuson an launching sa People’s Day Year 2 para sa mainland barangays kay 1,162 ka tawo ang nakadawat nan lain lain na serbisyo.
Ang programa ni City Mayor Pablo Yves L. Dumlao II na People’s Day, nag pokus sa paghasod sanan pagdaya sa lain lain na serbisyo gikan sa siyudad pasingod sa mga barangay.
Hamok an naka libre nan gupit sa buhok gikan sa Armed Forces of the Philippines sanan Rainbow Connection didto sa Brgy. Serna.
An Philippine National Police (PNP) Surigao City nan hatag sab nan libreng bugas para sa mga taga Brgy. Serna.
Bisan paman taas ang pila sa City Health Office sanan City Veterinary Office, nahuman gajud pag entertain ang tanan sa ila mga lain lain na panginahanglanon.
Mitambong sanan mihatag nan ila mga mensahe si City Mayor Pablo Yves L. Dumlao II, City Vice Mayor Alfonso Casurra, City Councilor Noel Christian Toti Catre Jr., City Councilor Baltazar Batang Abian, City Councilor Karl Duane Casurra, City Councilor Jonel Aldonza sanan Brgy. Captain nan Brgy. Washington Christopher Boyet Bonite.
Sa pag welcome message ni Kapitan Florenillo Ravelo, an kapitan nan Brgy. Serna, dako an ija pasalamat sa programa ni Mayor Paul Dumlao kay hamok sa ija mga kabaranggayon ang maka benepisyo sanan sa ika-duha na tuig nan People’s Day program mas hamok pa na serbisyo an tagdaya didto sa ila barangay.
Tagpaabot sab ni Mayor Dumlao sa ija mensahe na jauy mga nahuman sanan mga umaabot pa na mga proyekto para sa kalamboan nan mga taga Brgy. Serna. (Mark James Lisondra)
(Source: Surigao City PIO FB Page)
