Dinagat Islands – Migradwar na ang 3rd batch sa mga Seasonal Workers na mipailayom sa lima ka adlaw nga Agriculture Training didto sa Provincial Agri-Fishery Technology Demonstration and Research Center sa Barangay Justiniana Edera sa lungsod sa Dinagat Probinsya sa Dinagat.
Jaoy 302 ka mga aspirant seasonal workers ang dungan na migradwar jadton bernes didto sa nasangpit nga barangay diin mitambong isab ang mga opisyalis sa probinsya na gikalangkoban nila; 1st District Provincial Board Member Ali Adlawan, 1st District Provincial Board Member Carlos Bua, 2nd District Provincial Board Member Errol Condrad Dela Cruz ug ni Provincial Governor Nilo P Demerey Jr.
Mibutyag si Gov. Demerey Jr. na gipaningkamutan sa ija administrasyon na makalupad ang mga seasonal workers diin gipaabot pa niini ang bag-ong guidelines na ipagawas sa Department of Migrant Workers ug nasayran na kuman Marso 11 palargahon na ang mga seasonal workers ug magsugod na sila karong Marso 15.
Si Demerey Jr. Mihangyo isab ngadto sa mga mulangyaw na kong mahimo wayay pamilya nga maguba hangtod sa ilahang pagpauli diin posible kining mahitabo kay aduna nay pipila ka mga individual ang nagbuyag na.
Mibutyag isab si Demerey Jr., nga dako ang ija pasalamat na hamok nay mibalik sa Probinsya ug nagparehistro gumikan isab sa mga oportunidad na gipang-alagad ngadto sa mga dinagatnon suyod sa ija administrasyon. (Ronda 21 Mark James Lisondra, photo courtesy of Dinagat Islands PIO)