Tagdili anay an pagapasuyod sa mga buhi na manok ug lasangnon na langgam sa probinsiya nan Surigao del Norte sugod sa petsa 31 nan Marso hangtod Mayo 15, ini an sugo ni Provincial Governor Francisco ‘Lalo’ Matugas mahitungod sa Highly Pathogenic Avian Influenza (HPAI) na nagkanat na koman sa pipila ka mga probinsiya.
Base sa tagpagawas na Executive Order, an adlaw na mga piso, semilya sa langgam, presko na mga itlog, embryonate na mga itlog, tai sa manok/abono ug iban pa na mga poultry products gikan sa Luzon, Region XII ug lain pang lugar na may HPAI an dili pwede isuyod o dad-on sa probinsiya.
An Department of Agriculture Regulatory Division ug The Bureau of Animal Industry – Regional Veterinary Quarantine Services an magpatuman nan strikto na quarantine inspection sa mga nagkalain-laing transport terminal suyod sa probinsiya.
Sumaya kan Governor Matugas ini na lakang an kinahanglan ipatuman para maproteksyonan an 300-million Peso Poultry na Industriya nan probinsiya sa Surigao del Norte, apil sab an mayaot-na-epekto sa katawhan.
Sa impormasyon gikan sa Department of Agriculture, sukad an buyan sa Pebrero hangtod Marso koman na tuig, an mga lugar nan Bulacan, Pampanga ug Tacurong City, Sultan Kudarat an may kaso na nan HPAI.
