Sa report ni Annabelle Naig, Checkpoint Coordinator, na isa ka Atty. Henry Filoteo niadtong alas 3 sa hapon sa Agosto 17, 2020 tagpara ni Patrolman Rafael Salvacion III taghanapan nan Rapid Test Result apan wayay napakita an abogado. Tagabisohan sija ni Alegria Quarantine Control Point Miguel Clarito na required sa Provincial Ordinance No.7 an Negative sa RAT inigsuyod sa border nan Surigao del Norte. Sa rason na balik ra dajon si Filoteo sa idja pagkadto sa Butuan, dili na kinahanglan an rapid test. An rapid test dili maka detect nan CoViD-19 amoy rason na tag challenge nija an ordinansa.
Si FO1 Ymelyssa Paulines miawhag kan Atty. Filoteo na mohatag sa detalye sa idja biyahe sanan misugot na dayhon an referral form sa RAT ug dili na nila problema sa Alegria Checkpoint handlers kon mosuyod sija na wayay RAT result. Anaa na kaniya kon mokadto sija sa Provincial Hospital o mag-atubang kon unoy dangatan.
Apan sa ilang pagsusi sa Surigao del Norte Provincial Hospital pagkasilom, an handler sa Bad-as area nagreport na waya magpa rapid antibody test an abogado.
Samtang rason isab ni Atty. Henry Filoteo na subay sa DOH, dili na dapat an Rapid Antibody-based Tests an basihan na dili pasudlon an isa ka tawo sa isa ka lugar.
Sa idja suyat ngadto sa PNP Chief, nokadto sija sa Butuan sajo sa buntag Agosto 17, 2020 para pagtambong sa kaso na idja taglabanan sa RTC Butuan City. Pagsuyod nidja sa Quarantine Control Point sa Sto. Niño, Butuan City, tagpalusot dajon sija pagpakita nan IBP ID sanan isip APOR. An idja law office jadto sa Butuan City. Pagkahapon dihang mipauli na sija sa Surigao del Norte, pag-abot sa Alegria, tagpara sija sa PNP, tagpakanaug sa sakyanan taghanapan nan RAT negative result.
Tungod sa amo na panhitabo, nagsuyat sija sa labawng opisyal sa PNP aron iklaro an kahimtang nilang mga Authorized Person Outside Residence kon APOR. Tagsukip isab ni Atty. Filoteo an mga pipila ka basihanan. Siya isa ka APOR ug silang mga abogado nadiscriminate sa kaugalingon nilang probinsiya.
Samtang si Atty. Zander Plaza, Provincial Legal Officer nagkanayon na kinahanglan may negative Rapid Antibody Test result an ipakita sa tanan mosuyod pagbalik sa ato probinsiya subay sa ato ordinansa. Kini aron malikayan an local transmission sa ato dapit ilabina kon an isa ka nagbiyahe nagagikan sa lugar na may local transmission.
Sa panig ni Vice Governor Eddie Geed Gokiangkee Jr., kinahanglan gajud an RAT sa pag control sa mosuyod sa border sa ato probinsiya. Sa 300 kapin nga nagpositive sa Rapid Antibody Test nga mga locally stranded individuals nga nanguli sa Surigao del Norte, kapin sa 90 an naconfirmed CoViD-19 positive sa RT-PCR Test.
Sa interview kuman buntag kan Governor Francisco Matugas, RAT negative result an kinahanglan para makasuyod sa ato probinsiya. An RT-PCR Testing laboratory padajon pa na tagtrabaho sa Km.8, Barangay Bonifacio pinaagi sa tabang sa Philippine Red Cross. Mitabang an Taganito Mining Corporation, Platinum Group Metals Corporation, Adnama, mga contractors sama sa Socor, LC Ting, Cartesian Builders iban sa City Engineering sanan Provincial Engineering Office aron mapadali an paghuman niini. (RPN DXKS Surigao)