“Last but not the least” na barangay para sa People’s Day Year 2 an Brgy. Taft ug waya gajud magpaulahi an mga katawhan kay niabot sa 2,833 ka mga baranggayon sa Taft an naserbisyuhan sa programa ni Mayor Pablo Yves L. Dumlao II, kuman na adlaw, Agosto 9, 2024.
Tungod kay daghan an gusto makabayo nan mga oportunidad sa trabaho sanan mga livelihood na programa sa Taft, ni total sa 472 an nakaduol sa lain lain na serbisyo nan Public Employment Skills and Development Office (PESDO) na nag offer sab nan mga kurso sama sa TESDA Skills Courses.
Isa sab sa pinakahamok na naserbisyuhan an City Health Office kung diin 245 ka mga katawhan an nakapa medical check up sanan nahatagan nan tambay, 75 ka dental check up, sanan niabot sa 60 an naibtan nan ngipon.
280 ka eyeglasses sab an tagpan apod-apod didto nan Surigao Optometric Society sa mga nanay sanan tatay na nag edad nan 40 pataas.
Tungod kay kaiban man nan People’s Day permi an Rainbow Connection, Philippine National Police, sanan Philippine Army sa libreng gupit sa buhok, niabot sa 116 an naka libre nan gupit.
An mga pet owners waya sab magpaulahi, niabot sa 194 ka mga alagang hayop an nahatagan nan bakuna sanan 70 ang total sa mga iro sanan iring na tagpa kapon.
Sa gipahigayon na programa, didto nagpakita sa ila dako na suporta si City Mayor Pablo Yves L. Dumlao II, City Councilor Karl Duane Casurra, City Councilor Noel Christian Catre Jr., City Councilor Baltazar Abian, City Councilor Joenil Aldonza, Sangguniang Kabataan Federated President Jenelyn Edulzura, City Administrator Atty. Cristina Pariñas, City Legal Officer Atty. Lex Joshua Andrew Silvosa, sanan City Budget Officer Atty. Jeffrey Galido.
Didto sab nisuporta ang mga Barangay Officials nan Brgy. Taft sa pag panguna ni Kapitan Mario Gesta.
Full support sab didto an mga nagkalain lain na mga Department Heads sa Lokal na Panggamhanan sanan Heads nan mga ahensya na lakip sa programa.
Sa ija mensahe, nagpaabot si Mayor Paul Dumlao sa ija dako na pasalamat para sa tanan mga tawo na nitabang, naghago, sanan nag sakripisyo para lamang makahasod nan mga libre na serbisyo sa tanan barangay nan siyudad. Kay matod pa sa ato mayor, tumong sa programa na wayay mabijaan na barangay.
Nalukop na gajud nan People’s Day Year 2 ang 54 ka barangay na sakop nan siyudad para maghasod nan mga pulido sanan dekalidad na serbisyo. Kita kits na sab kita sa Year 3 puhon nan programa ni Mayor Paul Dumlao!
Salamat karadjaw sa tanan nitabang na mag malampuson ang programa alang sa tanan Batang Surigaonon!
(Source: Surigao City PIO)