Priso kuman sa Surigao City Police Station an 39 anyos na layaki human nalambigit sa Roberry with Force Upon Things na nahitabo sa Purok 4, Brgy. Canlanipa, SC.
Sumaya pa sa complainant na si Joenar Migullas Decatoria nagkanayon na ija na lamang na diskobrehan mga alas 5:30 nan buntag jadton Marso 12 na an ija tindahan gisuyod na sa kawatan.
Sa imbestigasyon nasayran na nawaya na an Solane tank, upat ka trays sa itlog, emergency light, ug Bearbrand Powder Milk na gibana-bana sa kantidad P6,420.
Dugang pa sa imbestigasyon nasayran na alas 5:30 sa buntag jadton Marso 12 gikan sa gawas sa ija tindahan, nadiskubrehan sa reklamante na pugsanon giguba an tabon sa buslot sa aircon.
Pagsuyod sa nasangpit na tindahan ija naobserbahan na nagkaguliyang an ija mga butang, ug pipila ka mga butang an nawaya. Nihimo ug hot pursuit operation an mga tinugyanan sa kapulisan na miresulta sa pagkasikop kagahapong adlawa sa Brgy. Canlanipa, SC mga alas 10:30 sa buntag.
Nakilay.an an suspek na si Jose Cotacte Azarcon, 39 anyos ug residente sa Purok 4, Brgy. Canlanipa, SC na diin narekober sa ija posisyon an solane tank. Sa pagka kuman giandam na an kaso na ipasaka batok sa suspek. (Mark James Lisondra)