Surigao City – Kritikal an kahimtang sa isa ka batan.on human kini gipusil sa waya pa makilay.i na suspek na nahitabo jadton adlaw’ng domingo sa may Purok avocado, Brgy. Quezon, Surigao City sa alas 11:15 nan duyom.
Nakilay.an an biktima na si Jose Cabunilas Pino, 20 anyos, layaki, ulitawo, estudyante, residente sa Purok Tambis, Barangay Quezon, Surigao City.
Sa inisyal na imbestigasyon nagdto na kay Carl Alayon Morales, 19 anyos na layaki, ulitawo ug isa ka senior high school student ug residente sa Purok Avocado, Barangay Quezon, Surigao City na amoy nakasaksi na sumaya pa gikan sila sa Kilometer 14, diin sila nitambong sa isa ka debut party ug sa dihang papauli na sila sakay sa isa ka motorsiklo.
Pag-abot sa lugar kung diin nahitabo an pagpamusil, si Morales mikanaog sa motorsiklo hampan an biktima pasingod sa Surigao City na direksyon.
Mga 50 metros an kalajuon, si Morales nakabati nan duha ka buto sa armas. Sa ija paglingi, ija nakita.an an duha ka waya makilay.i na mga layaki sakay sa puya na Honda XRM na walay plate number, pasingod sa Surigao City proper.
Sumaya pa sa pag hulagway sa witness na an mga suspek, an drayber nag sukbot nan gray na hoodie jacket, itom na bull cap, ug taas na pantalon, samtang an back rider nagsukbot nan puti na jersey, itom na bull cap, ug taas na pantalon.
Narekober sa crime scene an duha ka cartidge sa kalibre .45 ug an biktima daling gidaya sa Caraga Regional Hospital.
Sigun sa pamahayag sa attending physician na si Dr. Luzruth Almeda, an biktima nakaangkon g isa ka samad pinusilan, nisuyod sa ija tuo na sampot na maoy entry ug exit sa waya na hypo gastric area.
An mga personahe sa Surigao City Police Station nagpahigayon kuman nan hot pursuit operation alang sa posibleng pag-ila ug pagkasikop sa mga suspek. (Ronda 21 Mark James Lisondra)