CAGAYAN DE ORO CITY- Taliwala sa nagapadayon nga hulga sa coronavirus disease (COVID-19), ang Cagayan de Oro (Bugo) School Arts and Trades (COBSAT) nagproducir sa face masks ug gidonar kini sa mga staff sa Northern Mindanao Medical Center o NMMC ug mga trabahante sa gobierno nga anaa sa frontline sa pagresponde sa Covid-19. Ang mass production sa face masks gihimo sa maong tunghaan sa Cobsat agig commitment nila sa gobierno pakigbisog sa hulga sa Covid-19.
Moabot sa usa ka libo ug kinyentos o 1,500 ka mga face masks ang gidala sa Technical Skills and Development Authority o TESDA region 10 alang sa pagdistribute sa maong mga face masks. Samtang sa pikas bahin ang Department of Science and Technology- Northern Mindanao midonar usab sa laboratory supplies ngadto sa mga NMMC frontliners.
Ang DOST mihatag sa kinse (15) ka mga kinahon sa sterile gloves nga adunay 50 ka partisan matag kahon, 200 pcs nga shoe covers, 20 ka N95 masks, 100 ka surgical caps ug 50 ka surgical masks ngadto sa NMMC.
Sa ilang kabahin, ang Cagayan de Oro Chinese Community Groups midonar usab sa balor usa ka milyon ka pesos nga mga medical supplies ngadto sa NMMC agig pag suporta sa maong tambalanan batok Covid-19.