Mukabat sa tulo ka oras ang paningkamot sa mga bombero sa wala pa gideklarang fire out ang sunog nga miigo sa Burgos Street, Barangay 7, Cagayan de Oro City. Sumala kang FSINSP John Rey Donasco, Chief of Operations sa Cagayan de Oro City Fire District, padayon pa ang ilang imbestigasyon aron matino ang hinungdan sa insidente.
Matud sa Bureau of Fire Protection (BFP), gibanabana nga ₱1.23 milyon ang kadaot sa mga balay samtang ₱8 milyon usab ang kadaot sa usa ka fire truck nga naapil sa sunog tungod sa kusog nga hangin atol sa operasyon. Sa kinatibuk-an, 7 ka balay ang hingpit nga nasunog ug 3 pa ang partially damaged.
Gipataas ang alarma ngadto sa 3rd Alarm alas 5:27 sa hapon ug 4th Alarm alas 5:31 sa hapon. Gikontrol ang sunog alas 7:08 sa gabii ug opisyal nga gideklarang fire out alas 8:00 sa gabii. Mokabat sa 19 ka fire trucks, lakip ang mga volunteer fire brigades, ug 8 ka fire trucks sa BFP ang mitubag sa insidente. Gibanabana usab nga 800 square meters ang gilapdon sa lugar nga naapektuhan sa sunog.