Gipadayon sa City Government of Dapitan pinaagi sa City Environment and Natural Resources Office (CENRO) ang ilang regular nga coastal clean-up pinaagi sa pagpahigayon og Coastal Clean-Up Drive sa Barangay Bagting niadtong Agosto 4.
Naghiusa sa maong kalihokan ang mga kawani sa CENRO, mga opisyal sa barangay, ug mga boluntaryo aron hipuson ang mga plastik, marine debris, ug uban pang basura nga makadaot sa baybayon ug kahimtang sa kadagatan.
Tumong sa kalihokan ang pagpasig-uli sa kalimpyo sa baybayon samtang gipalig-on usab ang kahibalo sa komunidad bahin sa hustong pagdumala sa basura ug sa hiniusang responsibilidad sa pagpanalipod sa kinaiyahan.
Kabahin kini sa padayon nga programa sa CENRO diin matag Martes magpahigayon og coastal clean-up sa nagkadaiyang mga coastal barangay sa Dapitan City aron mapadayon ang pag-atiman sa mga baybayon sa siyudad.
Gawas sa regular nga clean-up drive, gipadayon usab sa City Government ang pagpatanom og mga lumad nga kahoy sa lainlaing barangay isip kabahin sa mas lapad nga kampanya alang sa pagkonserba sa kinaiyahan ug pagpalig-on sa kalikupan.
Pinaagi sa padayon nga mga inisyatiba, gilauman sa lokal nga panggamhanan nga mas mapalambo ang partisipasyon sa komunidad, mapataas ang kahibalo sa pag-atiman sa kinaiyahan, ug mapanalipdan ang coastal ug marine ecosystem sa Dapitan alang sa umaabot nga mga henerasyon.(IKEN B. GULLEM)
Source: Dapitan City Government