Sugdan na sa Hunyo 1 ning tuig ang Special Program for the Employment of Students kon SPES, diin kapin 5,000 ka mga benepisyaryo ang molambigit sa programa nga gilangkuban sa mga estudyante nag-edad 15 hangtod 30 anyos.
Aron mapatuman ang minimum public health standards, adunay bag-ong mga tahas ug aktibidades ang mga benepisyaryo diin dili na sila kinahanglan molakaw og layo sa ilang panimalay sama sa urban container household gardening, pag-post og information materials sa social media ug pagpatuman sa waste segregation.
Ubos sa maong programa, mahatagan og oportunidad ang matag benepisyaryo nga makakuha og ₱ 5,000 isip sweldo sulod sa 20 ka adlaw nga gihatag kanila aron matuman ang ilang mga gimbuhaton.
Sigun pa ni Ms. Kitkat Sorilla, PESO Manager, ikaduha na ka tuig nga gipatuman ang bag-ong inobasyon sa SPES taliwala sa pandemya, ug gani, nahimong model city ang Cagayan de Oro tungod sa mga bag-ong pamaagi nga gimugna alang sa padayon nga implementasyon sa SPES. (Sangguniang Panlungsod – CdeO)