Cebu City – Gilugwayan hangtod sa Domingo, Setyembre 6, ang biyahe sa mga PUVs o Public Utility Vehicles nga giisyohan og special permits sa Land Transportation Franchising & Regulatory Board o LTFRB VII.
Si Eduardo Montealto Jr., director sa LTFRB VII, mao mismoy mianunsyo sa extension sa validity sa special permit nga gi-grant sa mga PUV gikan sa Sept. 1 ngadto sa 6 pinaagi sa usa ka memorandum.
Sa  memorandum nga gitumong sa tanang operator sa  PUV sa Central Visayas, si Montealto miingon nga ang maong lugway nahasubay sa proclamation ni Pres. Rodrigo Duterte nga nagbutang sa ubang bahin sa nasod ubos sa MGCQ o Modified General Community Quarantine lakip sa Central Visayas.
Hinuon, gitataw ni Montealto nga walay labot sa exemption ang mga trucks-for-hire.
Nagkanayon si Montealto sa iyang memo nga ang tanang  moderno nga PUJ o Public Utility Jeep magpadayon pag-operate sa ilang rota basi sa Certificate of Public Convenience ug sa  Special Permit.
Gipasabot sa director nga ila kining gihimo aron dili mabalda ang pagpanakay sa mga public healthcare personnel ug ubang frontline workers nga padayong nag-alagad ubos sa  MGCQ o Modified General Community Quarantine. (Jhon Tadlip/ JTY)
(Source:Â LTFRB VII)