Cebu City – Gihangop sa mga Sugboanon ang pag-abot sa Spanish Royal Navy Training Ship Juan Sebastian Elcano nga midunggo sa Goodwill port, Marso 20, 2021 isip pag subay ug balik sa rota sa unang circumnavigation tibook kalibutan niadtong Marso 1521, diin ang Pilipinas, partikular na ang Sugbo nahimong tipik sa maong kasaysayan.
Sila si Cebu City Mayor Edgar Labella ug ang Konseho sa Syudad, Office of Presidential Assistant for the Visayas Undersecretary Jonji Gonzales, Lapu-Lapu Mayor Junard Chan ug ubang mga opisyal mainitong mi welcome sa kinatibuk-ang crew sa maong Spanish Navy Training Ship.
“Today, we relive history as it happened 500 years ago when Christianity was brought to Cebu and it gave birth to our deep-rooted faith in the Señor Santo Niño,” mensahi ni Mayor Labella.
Nahimo kini, matod ni Labella pinaagi sa unang paglibot sa tibook kalibutan nga karon gi re-enact.
“On behalf of the City Government, I welcome to Cebu the captain and crew of the Spanish Royal Navy training ship Juan Sebastian Elcano, led by Captain Santiago de Colsa,” paghangop ni Labella sa Kapitan ug sa kinatibuk-ang crew sa maong barko.
Milawig ang Sebastian Elcano gikan sa Espanya niadtong Oktubre 2020, miabot sa Suluan Guiuan Samar Marso 2021.
“They have sailed far and wide to get here, and it is an honor to have shown them our Cebuano brand of hospitality through a short and meaningful program yesterday morning (Marso 20), dugang mensahi ni Labella.
Diha sa pantalan, gidalitan ug sayaw sa Sinulog Festival Dancers gikan sa Tribu Lumad Basakanon Dance Troupe, kinsa hall of fame awardee sa Annual Sinulog Festival competition.
Gipadayag sa Mayor nga ang Syudad sa Sugbo excited nga nahimong tipik sa Quincentennial Commemorations, diin daghan pang gikatakdang mga kalihukan nga gipaabot sa mosunod nga mga semana ug buwan.
Panghinaut niya nga kini maoy magpahinumdum sa tanan sa lig-on nga pagtoo, taliwa sa giatubang nga mga hagit. (Jhon Tadlip/JTY)
(News & photo courtesy of Cebu City Public Information Office)
