Gipangandaman na karon sa Kagamhanang Lokal sa Dipolog ang pag-establisar sa usa ka “historical museum” nga hinganlan ug “Museo Dipolog”.
Tumong ug tuyo ning maong museo mao ang paghatag ug dugang kahibalo ug katin-awan pinaagi sa pagpakita sa mga butang, siyensiya o mga interes sa arte o kultura nga nahipos sa mga katigulangan o mga nanimuyo, sa mga panahon nga wala pa nahimugso ang Dipolog hangtud na sa kasamtangang panahon.
Sumala pa ni Mayor Darel Dexter Uy, nga ang Museo Dipolog maoy mahimong dalan kung unsa ang kahimtang sa Dipolog sugod niadtong panahon nga nahimo kini nga “settlement” tabuk sa suba. Dugang pa ni Mayor Uy nga makita usab sa mga katawhang Dipolognon ang mga gamit o kabtangan sa mga milabay nga nanimuyo dinhi lakip na ang kultura nga gisagop sa mga “early settlers” dinhi.
Gipasabot ni Mayor Uy nga aron masinati nato ang kamahinungdanun sa atong kagikan o “history”, kinahanglang nga makahibalo kita sa atong kultura ug kasaysayan nga mao usay maghatag kanato ug pagpanag-iya (ownership) aron mokat-on kita sa paghigugma sa atong dakbayan, sama sa usa ka butang nga imong gipanag-iyahan nga imo kining ampingan ug higugma-on gumikan kay imo kanang butang.
Gumikan niini nga kalambu-an, gi-awhag karon ni Mayor Darel Uy nga si kinsa kadtong mga Dipolognon nga makapa-ambit sa mga karaan nga mga hulagway o kabtangan nga ana-a sa ilang gipanag-iyahan nga makatampo sa pag-establisar sa Museo Dipolog, ang makigkita lang sa Historical Committee nga gipangunahan ni Konsehal Marilou Y. Calibo sa Sangguniang Panlungsod sa Dipolog, aron masabutan nila ang pagkopya sa mga hulagway o dili ba kaha ang pagpahulam sa mga “artifacts” diin ilhon ang tag-iya niini kung mapahimutang na kini sa museo.
“Ang tag-iya sa Museo Dipolog nga gitukod karon gipanag-iyahan sa tanang taga-Dipolog, busa magtinabangay kitang tanan nga mapa-ambit nato (Dipolognon) ang atong kagikan, dili lang sa atong bag-ong henerasyon, apan lakip usab sa mga lokal ug langyaw nga mga dumuduong,” panapos ni Mayor Uy.
(City Information Office-prr)