Iriga City – Sobra sa 130ng mga frontliners kan cuidad an nakatalaan na bakunahan sa nagpapadagos na rollout kan bakuna, alagad kun anong brand an dai pa aram depende sa maabot na bakuna sa Iriga.
Iyo ini an sinabi ni konsejal Sonny Magistrado matapos na gibohon an meeting asin i-plano an mga lakdang na gigibohon pag-abot kan bakuna hali sa DOH.
Sinabi kan konsejal na haman na an listahan asin kabali naman digde an mga medical frontliners sa cuidad hali sa magkapirang hospital.
Sinabi kan konsejal sa pakikipag-olay kan Radyo Ronda na haloy ng andam an gobierno local kan Iriga tanganing pabakunahan an mga miembros kan IMT, mga personahe kan city health sa pamamayo ni Dr. Ronald Perenia asin mismo an mga contact tracers sagkod emergency responders kan cuidad., alagad lininaw na dai pa digde kabali an mga BHERT sa 36 na barangay.
(Source: Interview with Sonny Magistrado)