Malampusong nabakunahan ang mokabat 1,737 ka mga health workers gikan sa walo ka Misamis Oriental Provincial Hospitals (MOPH) sa lungsod sa Magsaysay, Talisayan, Balingasag, Claveria, Manticao, Initao, Alubijid ug siyudad sa Gingoog lakip ang tulo ka pribadong hospitals sa mga lungsod sa Tagoloan, Jasaan ug Medina sugod niadtong Marso 12 hangtud 14, ning tuig.
Kini human mi-alokar og 178 Astra Zeneca vaccine vials ang Department of Health sa probinsya. Nagpasabot sab kini nga mokabat 1,780 ka tag-1.5ml doses tungod kay matag usa ka vial napulo na ka tao ang mamahimong e-inoculate.
Gikalipay og maayo ni Gobernador Bambi Emano ang nahitabong massive vaccination nga unang hugna pa lamang subay sa prioritization framework sa pagsiguro nga walay makalimtan ug malinawon ang pag-implementar sa vaccination process.
Sa wala pa gisugdan ang sunod-sunod nga pag-bakuna sa mga anaa sa listahan isip attested personnel for vaccination gikan sa nasangpit nga mga balay-tambalanan una na nga gipangunahan sa Provincial Health Office sa pagpangulo ni IATF Chief Dr. Jerie Calingasan ang pagpahigayon og Send-Off event nga gitambongan sa mga dagkong personahe gikan sa Department of Health-10, MOPH Chiefs of Hospitals, MisOr Municipal Health Officers, LGUs, PDRRMO, PNP-10, MODHA ug mismong si Gobernador Bambi Emano.
Sa maong kalihokan gipaniguro ang insaktong proseso gikan sa pagkarga ngadto na sa mga ambulansya ang mga AstraZeneca vaccine vials nga nakasulod sa Transport Boxes lakip ang mga documentary requirements sama sa Informed Consent Form, Covid 19 Vaccination Card ug mga Syringe.
Mismo ang amahan sa lalawigan nagsiguro nga safe ug secure ang mga vials.
Bililhon alang niini ang insaktong pagtransport ug paghandle niini gumikan dugay na kining gipaabot ug dili lang ni mosalbar sa isa o duha ka tao apan mao na kini ang paglaom nga mupakgang sa pag-kuyanap sa makamatay nga sakit sa CoVid-19.
“For quite some time we have dreamt. Today it has finally arrived. It will hopefully be able to start a new era of a glimpse of a good future,” matud ni Gobernador Bambi.
Si Dr. Jerie Calingasan mipadayag sa iyang hilabihan nga pasalamat ngadto kang Presidente Rodrigo Duterte ug sa tibuok pwersa sa DOH sa katumanan sa pangandoy nga masugdan na ang vaccination.
“As I have always said that at the end of the rainbow is a pot of gold, this is the pot of gold that we are looking for; a memorable thing that we will be doing,” sulti ni Dr. Calingasan.
Nagpasalamat sab si DOH OIC Director IV Dr. Ellienita N. Gamolo sa hugot nga pakigtimbayayong kanila sa pangagamhanang probinsya hilabina ang PHO nga og wala kini dili gyud mahitabo ang maong massive inoculation.
“We are thankful for the PGMO and PHO to get ready the people who will be vaccinated. Kay mag unsa man ang vaccine og walay magpa-vaccine,” dugang pahayag ni Dr. Gamolo.
Lauman nga sa mosunod nga mga adlaw laing hugna na sab sa health workers ang mabakunahan sama sa TPMFs, RHUs ug CHOs.
Taod-taod na nga gipaabot ni Gobernador Bambi kini nga adlaw nga ang tanan mga health workers nga tuig nang nakigbatok sa makamatay nga virus ang maluwas niini nga sakit pinaagi sa hustong pagpabakuna.
Kaluwasan sa panglawas ang usa sa prayoridad sa pamunoan sa amahan sa lalawigan hinungdan mapasalamaton kini nga hapit na makab-ot ang iyang pangandoy nga mahimong Covid-Free dili lang ang probinsya sa Misamis Oriental apan tibouk nasud sa Pilipinas. (Provincial Information Office – MisOr)