Arog kan pinaglalaoman asin tanganing magin klaro sa gabos na mga debotos kan Mahal na Ina Nuestra Sra. De Peñafrancia asin Sr. Divino Rostro, nagpaluwas nin pinagsarong deklarasyon an Diocese kan Caceres asin local na gobierno kan Naga na magigin giya kan gabos na debotos sa pagsikad kan nagtalikod na Biernes kan taunan na selebrasyon.
An deklarasyon, susog sa mandato kan IATF kun sain padagos na pinapalikay an publiko sa padagos na homa kan pandemyang dara kan covid-19 na padagos man an paglangkaw kan mga kaso sa rehiyon asin mismo sa cuidad nin Naga.
Dai man iginigilid kan simbahan an sobra na sa 300 na taon na debosyon sa mahal na ina, alagad mas maray na magin salbado an gabos kaya pinag-iinganyar an publiko kan inaapod na home based novena, O mag-atinder na sana sa mga haraning Parokya nganing padagos na masunod an mga minimum health protocol.
Inot kaini, dagos naman na kinanasilar an traslacion procession, kansilado naman an fluvial asin iba pang foot procession na mangyayari sa cuidad nin Naga.
Dagos naman na kansilado an mga aktibidad arog kan voyadores festival, civic and military parade, exhibits, concert asin pageant na taunan na pinag-gigibo kasabay kan selebrasyon.
Katakod kaini, tinaw’an nin duon ni Arsobispo Rolando Tria Tirona, na mas maray na magpagadye na sana sa saindang mga harong O kaya mag-antabay sa mga on line na misa na madadalan nin live sa paagui kan social media.