General Santos City – Magpahigayon ug press conference ang kapulisan sa dakbayan aron hisgutan ang mga kriminalidad nga nagakahitabo sa syudad kung asa wala nay ginapili nga oras ang mga kriminal.
Sumala kang Police Col. Jomar Alexis Yap, Acting City Director sa General Santos City Police Office nga tumong sa maong conference nga mahisgutan ang mga security measures nga angayang himuon ug kung unsaon nga mapakusgan ang pagbantay sa siguridad.
Usa matud pa nga nakita niya nga kinahanalang i-improve ang mga CCTV cameras kung asa kinahanglan nga mag-invest ang lokal nga panggamhanan gumikan dako kining tabang panahon nga adunay krimin.
Dugang pamahayag ni Police Col. Yap nga sa ilahang kabahin, ilahang ginapaningkamutan nga madugangan ang mga Police Station ug ang mga Police Compact ug aduna na silay mga na-identify nga mga lugar kung asa ipang-butang ang mga police compact ug mga sub-station.
Saysay pa niini nga gawas sa mga ginahimo nga lakang sa kapulisan ug uban pang mga law enforcement unit, paspas na usab ang mga impormasyon nga gina-hatag sa publiko.
Apan gi-angkon niya nga sa bulan sa Enero, ubay-ubay ang mga krimen nga naitala sa syudad kung asa sagad sa mga nahilambigit ang mga menor de edad, sama nalang sa 16 anyos nga nagpakamatay, 17 anyos nga gipusil-patay ug ang gang rape sa Barangay Calumpang kung asa mga menor de edad ang suspek ug biktima.
Kini matud pa ang ilahang gika-alarma rason nga naghimo na sila ug mga lakang uban ang mga ahensya sa gobyerno aron kini matutukan ug mahatagan ug igong pagtagad. (Fred Degala)
