Lima ka dagko na styrofoam boxes, tagbana bana tanan muabot sa 300 kilos an timbang sa tagkilaya na coral fragments sanan coral rocks, na tagdili an exploitasyon sanan exportasyon ubos sa RA 10654- an Fishery Code of the Phils. partikular sa section 96 an nasakmit nan BFAR Quarantine Lipata Station pinaagi na sa mga quarantine officers Cecille Cabonegro sanan Mark Geli, ubos sa superbisyon ni Mr Hanawi Alauya, an Chief Quarantine Officer nan BFAR Caraga Regional Office alas 3 sa hapon kagahapon Enero 29, 2020.
Na intercept an naasoy na kargamento sakay sa isa ka PHILTRANCO BUS na may body number1909 na pasingod Manila gikan ra dinhi ciudad Surigao. Sumaya kan Mr. Alauya na base sa ila imbestigasyon sanan pag inspection sa kargamento isa ka Andre Chua an shipper nan mga tagdili na coral fragments.
Dugang pa ni Mr. Alauya base sa proseso, trataron nan Adjudication Committee nan BFAR an mamahimong complaint, adesir ipasaka ngadto sa korte sa kasong paglapas sa Fishery Code of the Philippines. (Jhino Parrucho, Ronda 10 RPN DXKS)