Cebu City – Gipagawas na sa tagduma sa Basilica Minore del Sto. Niño ang schedule sa kalihokan para sa umaabot Pista Senyor karong buwana.
Nagpasabot kini nga taliwa sa hulga sa coronavirus disease o COVID-19 dili maputol ang selebrasyon sa tinuig nga pangilin sa balaang Bata.
Pinaagi sa social media, gianunsyo sa administrador sa simbahan ang gihan-ay nga kalihokan apan ipadayon ang plano nga walay kalihokan sa gawas sama sa Penitential Walk with Jesus, Penitential Walk with Mary, Traslacion, Fluvial Procession and Reenactment, ug Solemn Foot Procession aron kalikayan ang pagdasok sa mga tawo.
Gitakda ang kick-off o pagbukas sa mga kalihokang relihiyoso karong Biyernes, Enero 8, pinaagi sa Enthronement sa imahen ni Sr. Sto. Niño nianang alas 5:30 sa buntag nga sundan sa misa pagka alas 6 sabuntag.
Base sa advisory sa Basilica, ang tanang misa-nobena taposon sa tradisyonal nga sayaw sa Sinulog ug kini makita pinaagi sa livestream.
Sa pikas bahin, ipadayon usab sa simbahan ang pagpahigayon sa Hubo Mass sa Enero 22 ug mo-introduce sa ‘Post-Fiesta Special Friday and Sunday Masses’.
Hinuon, ipatuman gihapon ang health protocols sama sa paglimit sa manambong ngadto lang sa usa ka libo, pagdili pagpasud sa mga nag-edad og 15 anyos paubos ug 65 anyos pataas, pagsul-obog face masks ug face shields, pagdaog quarantine pass, ug uban pa.
Idili usab ang pagda og bakpak, pagkuhag hulagway ug pagda og paburot o balloon.
(Jhon Tadlip/JTY)
(Source & photo courtesy of Basilica Minore Del Santo Nino)