Iriga City – Nagpaluwas nan in kompirmasyon si Alcalde Margie Aguinillo kan Buhi, Camarines Sur na talagang igua na naman nin sarong kaso kan Covid 19 sa saindang banwaan.
Sigun sa Alcalde saro ining 40 anyos na babaye asin limang bulan na bados na sarong LSI hali sa Novaliches, Quezon City kun sain nagtrabaho bilang katabang sa sarong canteen sa construction site sa lugar.
Nag-abot an biktima kan petsa 25 kan hulyo alagad petsa 3 sana nagluwas an resulta kan swab test asin positibo sa SARS-COV-2 virus.
Katakod kaini, tulos man na dinara sa Camarines Sur Provincial Medical Center sa Banasi, Bula an biktima na ngunian pinagbubulong na kan mga doctor.
Sa lado kan local na gobierno kan Buhi, tulos naman na nagsasagibo nin contact tracing sa mga posibling nakasalamuha kan biktima kasabay kan pag pagadye na makasalvar man lugod kaiba na an saiyang ipinagbabados na omboy. (OIC Melvin Barayoga, RPN DZKI Iriga)
(Source: LGU Buhi)