30.9 C
Manila
Friday, March 29, 2024

Sarangani Province Nangandam Na Sa Taliabot Nga Ramadan

- Advertisement -

Nangandam na karon ang probinsya sa Sarangani sa taliabot nga bala-anong pagtamod sa bulan sa Ramadan. Segun ni Ustadz Abdulgapor Sasugod sa Sapu Masla, Malapatan, mahitabo ang ilang moonsighting karong Domingo, Abril 11. Kung walay kakulian sa panahon, posible matud pa nga magsugod ang ilang puasa sa Abril 12 o dili ba kaha sa musunod nga adlaw.

Nagpasalamat na daan si Ustadz Sasugod ngadto sa pamunuan ni Governor Steve Chiongbian Solon tungod matag tuig walay sipyat matud pa nga gapang-apud apod ang Kapitolyo katugbang ang mga munisipyo ug sila Senador Manny ug Congressman Ruel Pacquiao og mga ayuda kanila, sama sa mga sinakong bugas. Hinuon pinug-ngan ang ilang mga kalihukan tungod sa pandemya.

Una pa man saulugon ang Ramadan, ubay-ubay nga mga programa ug aktibidad ang napatigayon sugod pa lang sa tuig nga padayong ikalambo sa Moro community sa entiro Sarangani Province. Usa na niana ang pag-turnover sa pasiuna nga livelihood assistance ngadto sa Muslim peace and development association sa Barangay Pangyan, sakop sa lungsod sa Glan nikantidad og ₱ 1.9 Milyon ka pesos.

Gilangkuban sa lima (5) kabuok bangkang panagatan, napulo (10) ka radio handset, usa (1) ka radio base, napulo (10) ka magnetic compass, pukot, baterya, ug ang naunang gihatag nga sakyanan Isuzu elf truck. May muabutay pa nga dungag ₱ 1.9 Milyon ka pesos nga kantidad sa panginabuhian gumikan ₱ 3.8 Milyones ka pesos ang ilang kinatibuk-ang madawat gikan sa programa sa nasyonal nga gobyerno partikularmente sa opisina sa OPAPP gitawag nga PAMANA katugbang ang DILG, pinasubay kini sa bidding process nga gilatid sa national procurement law. Unang nakadawat ang mga barangay sa may Maasim.

Ginahikay na usab karon ang mga papeles sa Sulong Kapayapaan program ni Governor Solon sa pagpanguna nila Kalinaw Program Manager Jennifer Kamid ug Technical Assistant Renilda Abdon, alang sa Katorse Milyones ka pesos (₱ 14M) nga pondo para sa lima (5) ka munisipyo sa Sarangani Province nga maka-benepisyo sa infrastructure program sa OPAPP kon Office of the Presidential Adviser on the Peace Process sa liderato nila Pangulong Rodrigo Duterte ug Secretary Carlito Galvez.

Samtang, sa hisgutan nga Madrasah o Madaris Arabic school, busy karon ang Madaris for Peace program ni Governor Solon sa pagpangamot nila Program Manager Hannan Hashim ug usa sa mga convener sa Governor’s Commission on Moro Affairs nga si Asma Akmad. Gilihok nila ang mga papeles aron ang walo (8) kabuok pasiuna nga Madrasah center sa Sarangani Province ang ma-accredit na sa Department of Education, katambayayong ang OND HESED Foundation, Mahintana Foundation ug Maguindanaon Development Foundation.

Kung ma-accredit sa DepEd, dakong ayudang pinansyal gikan sa nasyonal nga gobyerno ang mahatag sa kada Madrasah, ug mugamit na usab sila sa curriculum sa K to 12 education nga dili lang tanan sa Arabic nga mga pagtulun-an ang tun-an sa mga kabataang Muslim.  Dili na kinahanglan nga magpa-enrol pa sa eskwelahan sa DepEd hangtud senior high school kundili pwede na magtuloy-tuloy eskwela sulod sa Madrasah school gikan kindergarten.

Malipayon na lang usab ang mga ustadz nga maoy mga facilitator ug nagtudlo sulod sa mga Madrasah tungod gipadak-an pa nila Governor Solon ug sa mga board member sa pagdumala ni Vice Governor Elmer De Peralta ang ilang binulan nga honorarium. Adunay 125 kabuok Madaris facilitator sa 49 ka Madrasah center ang ginatagaan og allowance matag bulan sa Provincial Government sa Sarangani.
(Provincial Information Office – Sarangani)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -