Gipailalum ang tibuok Sarangani Province sa Modified General Community Quarantine/GCQ sugod karong adlawa, Mayo 1. Sa gipirmahan ni Governor Steve Chiongbian Solon nga Executive Order No. 12, mulungtad ang Modified GCQ hangtud Mayo 15 depende unya sa ebalwasyon sa lokal nga gobyerno ug sa direktiba sa nasyonal nga gobyerno.
Segun ni Governor Solon, walay dakong kausaban sa pagpatuman sa Modified GCQ gikan sa gipatuman sa Sarangani nga Modified Enhanced Community Quarantine gumikan parehas ra gihapon ang bottomline nga anaa sa kwarantina ang entiro komunidad. Aduna ray mga piniling industriya ang abrihan aron magpadayon ang ekonomiya ug panginabuhian.
Bag-uhay lang, nagka-meeting ang Gobernador ug ang pito (7) ka mayor sa Kapitolyo sa Sarangani aron i-plastar ang mga patakaran nga i-obserba ilalum sa Modified General Community Quarantine, alayon sa kamanduan sa national ug regional inter-agency task force, sa pagsuporta kana nila Vice Governor Elmer De Peralta, tanang board member ug nila Senador Manny ug Congressman Ruel Pacquiao.
Matud pa ni Governor Solon, padayon nga ipatuman ang health standards, sama sa compulsory nga pagsul-ob og face mask kung mugawas sa balay, manghugas ug mag-sanitize sa mga kamot, duha (2) ka metros nga physical distancing, temperature checking, ug ang pagbutang og regular disinfection area sa mga establisemento.
Magpuyo usa sa balay ang baynte (20) anyos paubos ang edad ug kadtong mga senior citizen, buntis ug may mga balatian. Walay tugutan nga maglatagaw nga walay hinungdan, inay essential ug emergency nga byahe lamang. Magpadayon nga ibawal ang pagpahigayon og mga aktibidad nga magpatapok og mga tao, apil na ang mga kalihukan sa simbahan. Gidid-an ang pag-abri sa mga beach resort ug uban pang kalingawan ug kahilayan sama sa sugal ug inuman, bisan ang mga internetan/internet cafe maliban na lang kung gamiton alang sa pag-research ug online schooling.
Ipadayon sa mga munisipyo ang pag-cluster sa mga barangay ug ang pag-implementa sa “window hours” aron dili magdasok sa palengke ug essential establishments. Ang curfew ang dili mulampas sa alas nuybe sa gabii (9pm) ug dili pud mulampas sa alas singko sa buntag (5am).
Mao na matud pa kini ang gitawag nga “new normal,” ang bag-ong normal nga pagkinabuhi karon, walay pagkumpyansa, samtang wala pay bakuna nga na-imbento aron mupahunong sa pagtakboy sa makamatay nga Coronavirus.
Hugot sa gihapon nga ipatuman ang regional lockdown sa mga boundary area sa pikas rehiyon, hilabi na nga anaa pa sa Enhanced Community Quarantine ang Davao Region ug aduna pay mga kaso sa COVID-19 ang pipila ka lugar sa Bangsamoro Autonomous Region, bisan na ang pipila ka bahin sa Rehiyon Dose. Apil sa regional lockdown ang pagtabok sa Sarangani Bay ug Celebes Sea.
Sa public transportation sa Sarangani Province, pagatugutan na nga mamasada ang mga pampublikong sakyanan, hugot sundon lang ang palisiya sa physical distancing ug ang pag-limit sa mga pasahero nga makasakay. Sa motor ug habal-habal, usa ka pasahero ang makasakay pero dapat mag-pamilya ang maong pasahero ug drayber. Sa traysikel-traysikad, usa ka pasahero sa atubangan, usa pud sa likod. Duha (2) ka pasahero sa kotse ug pick up, samtang katunga sa seating capacity ang sa mga van ug multicab apil na ang mga gasakay sa mga bangka aron managat.
Epektibo sa gihapon ang provincial border lockdown. Kadtong musulod sa Sarangani gikan sa laing probinsya ug syudad nga walay COVID-19 transmission ang gikinahanglan nga mupailalum sa gihapon sa katorse (14) ka adlaw nga quarantine. Adunay ipakita nga health certificate gikan sa gigikanan nga lugar nga wala kini nakasinati og sintomas sa nakalabay nga katorse (14) diyas.
Samtang, sa mga trabahante/essential workers nga musulod sa Sarangani, magpakita lang og sertipikasyon gikan sa ilang kumpanya nga sila mga empleyado niini ug sila ang walay gibati nga mga sintomas sa nakalabay nga katorse (14) ka adlaw. Kung mahimo, gamiton sa kumpanya ang ilang mga empleyado nga residente sa Sarangani Province aron dili na mugawas-sulod pa sa probinsya. Rekomendado sa gihapon ang alternative work arrangement ma-publiko man o sa pribadong opisina.
