Aduna na lay onse (11) kabuok active cases sa COVID-19 ang probinsya sa Sarangani, basi sa DOH report kagabii, human nga nadugangan ang ihap sa mga naka-recover. Aduna na karoy 112 ka mga indibidwal ang naka-recover ug nanga-ayo sa Sarangani Province, 11 ang active cases.
Pinakaubos kini nga active cases itandi sa ubang mga LGU sa tibuok Rehiyon Dose. 181 ang active cases sa South Cotabato, 153 sa Gensan, 78 sa Cotabato City, 55 sa North Cotabato, ug 15 sa Sultan Kudarat.
Gikalipay na lamang sa mga taga-Sarangani Province nga walay medical frontliner ang natakdan og Coronavirus. Sa proteksyon sa Buhing Dyos, walay gikabalita hangtud sa kasamtangan nga medical worker ang natakdan sa Sarangani. Sa training sa tanang contact tracing team, gipaniguro ni Governor Steve Chiongbian Solon nga protektado sila nga mga frontliner sa LGU pinaagi sa paghatag kanila og mga kagamitan, sama sa face mask, face shield ug PPE suit, ug ang pagpahigayon og mga skills training aron masinati ug mabansay pirme sa ilang mga gipang-trabaho.
Sa gideklara nga local transmission sa Gensan, South Cotabato ug Sultan Kudarat, dili na layo nga mataptan og Coronavirus, maong paspas magpabalo sa mga health center ug municipal hospital aron hinanaling matabangan.
Kung makasinati og sintomas sa flu, sama sa hilanat, ubo, sip-on, sakit sa lawas-pamaol ug sore throat/katol ang tutunlan, naay diarrhea, dili na kalasa sa gikaon ug dili na usab makasimhot, angay nang mabalaka. Subli usab nag-abiso si Governor Solon nga una musulod sa pinuy-anan, hubuon ang gipangsuot sa lawas ug humulan sa pipila ka mga oras una labhan. Maligo una musulod sa balay panigurado nga walay kagaw nga madala sa panimalay.
(Public Information Office – Sarangani)