Gisugyot ni konsehal Enrico Salcedo, chairman sa komite sa environment and natural resources, ngadto sa mga quarry operator nga mano mano ang pamaagi sa pag-quarry sa pagkompleto sa tanang rekisitos nga gisitar sa Department of Environment and Natural Resources (DENR) ug Department of Public Works and Highways (DPWH).
Kini aron maaksyonan sa syudad pinaagi sa City Local Environment and Natural Resources (CLENRO) ang ilang aplikasyon sa quarry permit aron matugutan nga makapadayon sa ilang operasyon.
Sa miaging tigom sa komite, gipasabot sa konsehal nga iyang nasabtan ang mulo sa quarry operators tungod kay panginabuhi kini gawas nga makatabang usab nga mapalawom ang suba apan adunay mga rekisitos nga gisitar ang duha ka ahensya sa gobyerno aron maisyuhan sa gikinahanglang clearance pagproseso sa CLENRO.
Matod ni Salcedo nga kun makompleto na ang mga rekisitos mahimo na maproseso sa CLENRO ang ilang aplikasyon.
Kun ako lang nakasabot ko kay kapanginabuhian man kini apan kinahanglan nga tumanon lang ang mga rekisitos, pamahayag ni Salcedo. (Sangguniang Panlungsod – CdeO)