Tagbutyag ni Dr. Emmanuel Plandano, City Health Officer human sa meeting nan Regional Vaccination Operation Committee kahapon na sa upat ka confirmed COVID-19 Delta variant nga nahibayuan sa Surigao City, nakarecover o nadajaw na an tuyo apan napatay an isa.
An tuyo na naka-recovered na dihang migawas an resulta sa Philippine Genome Center amo an 67 anyos na layaki na taga Brgy. Taft kansang specimen nakolekta niadtong Agosto 1, 2021; 23 anyos na babaje na taga Brgy. Washington kansang specimen nakolekta niadtong Agosto 2, 2021; 29 anyos na layaki na taga Brgy. Poctoy na an idja specimen nakolekta niadtong Agosto 4, 2021. An ikaupat na confirmed Delta variant na nakolekta an idja specimen niadtong Agosto 7, 2021 an nakabsan sa kinabuhi. An pasyente isa ka 79 anyos na babaje na residente sa Brgy. Taft, Surigao City.
Samtang nanawagan si Surigao City Mayor Ernesto Matugas Jr. na likayan anay an pagkadto sa mga lugar na hamok tawo ilabina sa City Boulevard. Sumala pa na sa waya pa an Charter Day sa syudad o sa talitapos nan buyan sa Hulyo nanakod na an Delta variant tungod sa pagtaas kuman sa kaso.
Dugay mogawas an resulta sa genome sequencing hinungdan na ulahi na nahibaw-an na may Delta Variant na sa syudad. Matag isa sa mga Surigaonon kinahanglan motabang pinaagi sa pagminos sa mga panaw, magpabakuna sanan an pagsunod sa minimum public health standard aron dili moisan an mga kaso na niadtong Lunes, Setyembre 20, 2021 miabot na sa 161 an mga aktibong kaso sa COVID-19 sa Surigao City.
(RPN DXKS Surigao)