Subling miatake na usab ang mga wala mailhing suspetsado nga riding in tandem diin dead on the spot ang usa ka canning factory worker, samtang anaa karon sa usa ka balay-tambalanan ang kauban niini tungod sa nahitabong shooting incident sa Purok Diamond Valley Barangay Tambler Syudad sa General Santos banda alas 6:45, Martes sa gabii, September 29.
Base sa imbestigasyon sa kapulisan nailhan ang dead on the spot nga biktima nga si Abdul Asis Addul 30 anyos samtang ang kauban niini naila nga si Halid Mocles, parehong residente sa nasampit nga barangay.
Gibutyag sa kapulisan nga nagsakay ang duha sa XRM nga motorsiklo sa dihang kalit nga gipusil sa riding-in-tandem suspects ang duruha sa wala pa matinong motibo.
Kahinumduman nga tulo ka adlaw pa lamang ang naka labay human sa nahitabong pagpamusil patay sa usa ka Nathaniel Labiton nga hinimuan usab sa wala pa mailhing mga suspetsado nga riding in tandem diin nagpabiling misteryo sa gihapon ang kasulbaran sa mga nahisgutang serye sa mga pagpamusil patay sa dakbayan.
Sa kasamtangan padayong misinggit ug hustisya ang mga kabanay sa mga biktima ug malaomon nga mahimo sa kapulisan ang ilang pag hatag ug kasulbaran sa maong mga kaso.
(OIC Cris Legaspi, RPN DXDX GenSan)