Davao del Norte – “Buhi o Patay ipadayon ang Retrieval Operation sa upat ka mga Treasure Hunter” kini ang gimando ni Sto Tomas Mayor Ernesto Evangelista dihang gihinabi sa RPN DXKT Davao. Ang upat ka mga Treasure Hunter ang natabunang buhi sa gihimong Treasure Hunting sa purok 1 Barangay Kinamayan Sto. Tomas niadtong nakalabayng Domingo.
Sumala pa ni Mayor Erning nga buot niyang makuha ang upat ka mga individual aron makuha usab sa ilang tagsa tagsa ka mga pamilya. Dugang pa sa Mayor nga buot usab niya nga matuldukan ang isyu nga matud pa nakuha na ang Treasure ugaling undangon ang retrieval operation nga wala makuha ang mga natabunan.
Nasayran nga naglisod ang mga nagkadaiyang rescue team nga nagtinabangay sa pagsalbar unta nga buhi ang upat ka mga treasure hunter sa pagsugod pa lamang sa operasyon. Kini gumikan sa lustrak ang yuta sa lugar nga dali lamang mahugmak sa gamayng lihok lamang sa backhoe.
Karong adlawa ika pito ka adlaw na nga nagpahigayon ug retrieval operation ang gimugna nga Inter-Agency Command System nga migamit na ug Snake Eye aron lamang matultulan ang nahimutangan sa upat ka mga Treasure Hunter.
Nasayran pa gikan ni Mayor Evangelista nga taman lamang ugmang adlawa ang iyang gihagag nga tagal sa mga rescuers nga naglangkob sa Municipal Disaster Risk Management, Provincial Disaster Risk Management Office, Central 911 sa Davao City, Disaster Team gikan sa Davao de Oro ug ang Special Rescue Team sa Bureau of Fire Protection.
Sa pikas bahin, nagbahad ang Mayor nga mag atubang ug dakong tulubagon ang nagpaluyo sa nahisgutang treasure hunting nga nagkalas sa upat ka mga kinabuhi. Kahinumduman nga nagpagawas ug Stopage Order ang lokal nga kagamhanan niadtong bulan sa Pebrero bahin sa maong operasyon apan sa hilom ug gitago ang pagpadayon sa Treasure Hunting nga miresulta sa disgrasya. (Michael Manguhig)