Cagayan de Oro – NUNOT sa kamanduan sa Department of the Interior and Local Government (DILG) Memorandum Circular No. 2024-083 nga mag-inventory ug mag-monitor sa mga local online gaming operations sa ilang mga lugar, nagpahigayon og joint inspection ang Regulatory Compliance Board (RCB), ug ang Business Permit and Licensing Division (BPLD) Martes, Hulyo 16, 2024.
Sa record sa BPLD adunay 10 ka online gaming operations dinhi sa syudad diin subli niining gisusi ang mga dokumento ilabina ang mga business permit ug ang ilang operations kon wala ba kini nasupak nga mga balaod.
Si Atty. Jose Edgardo Uy, co-chairman sa RCB mipasabot nga ang kamanduan sa DILG nahimo gumikan sa taho nga pagkuyanap sa mga online gaming operations sa nagkadaiyang localities nga walay lisensya ug pagtugot sa gobiyerno.
Gawas sa ilegal nga pagpadula, ang operasyon nalambigit usab sa cyber-crimes sama sa online scams, digital fraud, ug human trafficking.
Tungod niini, gipahinumdoman sa DILG ang mga city ug municipal mayors ingon man mga concerned local government officials sa ilang katungdanan ug gahum sa pag-regulate sa mga negosyo ug pagpatuman sa pagsunod sa mga sumbanan kahimsog sa panglawas, seguridad ug sa building standards.
News and photo courtesy of CIO CDO