Nagpadayon karon ang fundraising campaign sa tibuok probinsya sa Sarangani gitawag nga “Radyo para sa Baryo.” Inisyatibo kini sa mga kabataan sa Sarangani Province aron matabangan nga matagaan og libreng portable AM-FM radio ang mga estudyante nga radyo ray maabot nga signal sa ilang gipuy-an sa kabukiran, aron makapadayon sa ilang pag-eskwela karon nga pag-abri sa klase gumikan wala pay face-to-face nga pagtuon.
Segun ni Ms. Gretchin Boni sa Sulong Kabataan program ni Governor Steve Chiongbian Solon, target sa “Radyo para sa Baryo” fundraising campaign nga makatigum og dili muubos Two Hundred Thousand Pesos (P200K) aron makapalit ug makahatag og usa ka libo (1K) kabuok radio units para sa mga magtutungha sa “Last Mile Schools,” kadtong mga eskwelahan nga layo na sa sentro sa ilang munisipyo.
Samtang, sa pikas nga bahin, gipabantay karon ang mga taga-Sarangani ug entiro Region 12 tungod sa gikabalita nga posible nga local transmission sa probinsya sa Sultan Kudarat, Polomolok, South Cotabato, ug ubang parte sa Region 12.
Padayon ang panawagan ni Governor Solon kauban sila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayor sa Sarangani Province, nga walay mu-relax aron walay mahitabo nga community transmission kon pagtakdanay. Gawas sa face mask, obligado napud musuot og face shield sa entiro Pilipinas hilabi na sa mga sakyanan.
Lauman ang dungag direktiba nga ipatuman sa probinsya sa Sarangani human nga nagpatuman og border control ang South Cotabato ug dakbayan sa General Santos aron malimitahan ang pagsulod-gawas sa mga tao sa importanteng lakaw lamang. Subling gipahugtan pud ang inter-regional lockdown for non-essential travel nga gi-implementa sa Regional Inter-agency Task Force sa Rehiyon Dose. (Provincial Government Of Sarangani Sarangani Public Information Office)
