Nagpadayon karon ang fundraising campaign sa tibuok probinsya sa Sarangani gitawag nga “Radyo para sa Baryo.” Inisyatibo kini sa mga kabataan sa Sarangani Province aron matabangan nga matagaan og libreng portable AM-FM radio ang mga estudyante nga radyo ray maabot nga signal sa ilang gipuy-an sa kabukiran, aron makapadayon sa ilang pag-eskwela karon nga pag-abri sa klase gumikan wala pay face-to-face nga pagtuon.
Segun ni Ms. Gretchin Boni sa Sulong Kabataan program ni Governor Steve Chiongbian Solon, target sa “Radyo para sa Baryo” fundraising campaign nga makatigum og dili muubos Two Hundred Thousand Pesos (₱ 200K) aron makapalit ug makahatag og usa ka libo (1K) kabuok radio units para sa mga magtutungha sa “Last Mile Schools,” kadtong mga eskwelahan nga layo na sa sentro sa ilang munisipyo.
Samtang, sa pikas nga bahin, kwarentay-sais (46) na ka mga taga-Sarangani ang naka-recover sa COVID-19. Kagabii, gideklara sa Department of Health nga baynte-tres (23) na ka mga Sarangan ang nag-negatibo na sa ilang mga swab test.
Una ng nakauli sa tagsa-tagsa ka panimalay ang laing baynte-tres (23) pud ka mga indibidwal, maong kwarentay-sais (46) na tanan ang naka-recover sa probinsya sa Sarangani subay sa datus sa DOH kagabii.
Aduna pay baynte (20) ka tao ang naghulat sa ilang negatibo nga resulta. Silang tanan mga LSI ug Returning OFW nga kasagaran walay sintomas.
Padayon lang ang panawagan ni Governor Solon kauban sila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores, nga walay magkumpyansa aron walay mahitabo nga community transmission, ug padayon lang nga magsuot og face mask, dos metros (2 meters) physical distancing, dili mudungan sa panagtapok sa tao, manghugas pirme sa mga kamot, ug magpuyo sa balay kung walay importanteng lakaw.
(Sarangani PIO)