Cebu City – Gihangyo sa CCPO o Cebu City Police Office si Mayor Edgardo Labella nga ipadayon ang pagpagamit og quarantine pass sa mga manimbahay sa Misa de Gallo aron mapugngan ang gidaghanon sa tawo nga manggawas sa balay.
Si Lt. Col. Wilbert Parilla, deputy director for operations sa CCPO, miingon nga lisod ang pagduma sa duot sa katawhan kon isuspenso ang quarantine pass sa mga adlaw sa novena mass gikan sa Disyembre 16 ngadto sa 24.
Suma pa ni Parilla, wala pa sila makadawat og opisyal nga direktiba sa pagsuspenso sa passes apan nangan dam na sila kon ugaling tinud-on man kini sa mayor.
Pero alang nila, gikinahanglan gihapon ang quarantine pass sanglit ubos pa man ang siyudad sa kwarantina.
Sa nasayran, gipadayag ni Mayor Labella sa miaging adlaw nga wala na kinahanglana ang passes sa mga adlaw sa Misa de Gallo basta magtamod lang sa minimum health requirements.
Matod ni Parilla, ang usa sa major challenges nga ilang atubangon kon dili ipagamit ang quarantine pass mao ang pagbantay sa publiko ug pagseguro nga mapatuman ang health protocols.
Sanglit wala na may augmentation force, ang CCPO wala nay igong tawo nga maka-monitor sa tanang Parokya sa siyudad ug ilabina sa gipaabot nga paghugop sa mga manimbahay.
(Jhon Tadlip/JTY)
(Source & phot courtesy of Cebu City Police Office)
