Laing pagpasalamat na usab ang gipadangat ni Governor Steve Chiongbian Solon tungod sa dungag kaayuhan nga maangkon sa probinsya sa Sarangani gumikan muhatag na usab og donasyon ang Department of Health pinaagi sa usa (1) ka modernong ambulansya nga kumpleto na sa mga himan may kinatibuk-ang kantidad kini nga muabot og ₱ 2.3 Milyon ka pesos.
Sa sesyon sa Sangguniang Panlalawigan kagahapong adlawa, adlaw nga Martes, giduso nila Board Member Joseph Calanao ug Board Member Irish Arnado sa SP Committee on Legal Matters ug Health, ang gi-certify urgent ni Governor Solon nga pagpangayo og pagtugot nga pirmahan ang deed of donation tali sa Gobernador ug ni DOH Region 12 Regional Director Aristides Tan alang sa maong bag-ong ambulansya. Walay duha-duha kining gi-aprobahan sa tanang board member sa pagpanguna ni Vice Governor Elmer De Peralta.
Segun ni Board Member Arnado, dakong tabang ang dungag nga ambulansya nga mabutang sa Sarangani Provincial Hospital hilabi na matud pa nga gikan sa pagsugod sa Coronavirus pandemic, nagsilbi na nga provincial COVID isolation center ang Sarangani Provincial Hospital.
Gikalipay kini sa mga nagdumala sa provincial hospital sa Sarangani Province sa pagdumala ni Doctora Aileen Brion, ang chief of hospital. Ginahan-ay na lang nila ang mga papeles aron ma-turnover na. Dakog hawan ang likod nga bahin sa ambulansya nga pwedeng matindugan og nurse samtang ga-assist sa gikarga nga pasyente.
Niaging semana, nakadawat pud og duha (2) kabuok ventilator ang Sarangani Provincial Health Office gikan sa OCD o Office of Civil Defense Region XI. Lagpas Usa ka Milyon ka pesos (₱ 1M+) ang balor sa matag ventilator.
Matud pa ni Mr. Bong Yadao, ang medical technologist sa PHO Sarangani ubos sa opisina ni Provincial Health Officer Dr. Arvin Alejandro ug nangulo sa provincial epidemiology and surveillance unit, dakong tabang ang ventilator sa mga pasyente nga maglisod sa pagginhawa, hilabi na kadtong labing maigo sa Coronavirus, sa pag-suplay og oxygen sa lawas.
Sa talaan sa DOH 12 kagabii, singkwentay-syete (57) na kabuok mga taga-Sarangani Province ang gikaluy-an sa Ginoo nga naka-recover sa COVID-19. (Sarangani Public Information Office)
Human unya sa panagtigum nila Governor Solon, Regional Inter-Agency Task Force ug pito ka mayor sa pagsuporta nila Senador Manny ug Congressman Ruel Pacquiao, lauman ang dungag direktiba nga ipatuman sa probinsya sa Sarangani pagkatapos nagpatuman og border control ang lalawigan sa South Cotabato ug dakbayan sa Heneral Santos tungod sa gikabalita nga mga local transmission sa Isulan, Sultan Kudarat, Polomolok, South Cotabato ug bisan na sa Gensan.
May mga gipatuman na nga mga granular lockdown sa mga nasangpit nga lugar karong panahuna aron mapugngan ang pagkalat sa virus. Dili na lang muadto sa Gensan ang walay importanteng tuyo tungod sa gipatuman nga border lockdown. (Provincial Government of Sarangani – Public Information Office)