Gilusad gahapon sa tulo ka highly urbanized cities sa Sugbo – Mandaue, Lapulapu ug Cebu City – ang Project Balik Buhay subay sa gitinguhang pagbukas sa ilang ekonomiya ug pagtubag sa krisis sa pandemic sa ikatulong semana sa Mayo.
Ang tulo ka siyudad nag-atubang karon og hagit sa pagbalansi sa economic sustainability ug sa public health security taliwa sa ilang tinguha pagtakli ngadto sa modified enhanced community quarantine.
Ang naasoyng mga siyudad ang miangkon sa 80 porsyento sa kinatibuk-ang ekonomiya sa Sugbo diin ang Cebu City ang sentro sa patigayon, ang Mandaue sa manufacturing, ug ang Lapulapu sa export, travel, ug hospitality industries.
Pero ang maong mga dakbayan wala pasayloa sa kadaot ug kahasol sa coronavirus disease o Covid 19 ug sa pagpaubos sa lalawigan sa ECQ o enhanced community quarantine.
Kagahapon, ang mga mayor sa tulo ka siyudad ug mga opisyal sa Department of Health o DOH-7 ug sa OPAV o Office of the Presidential Assistant for the Visayas milusad sa Project Balik Buhay.
Lakip sa unang mga lakang nga himoon sa mga dakbayan sa pag-ila sa kapalaran sa ECQ mao ang strategic mass testing kansang target mao ang 10 porsyento sa total household population.
Si Konsehal Raymond Garcia, nga mipresentar sa planos a mass testing sa Cebu City, miingon nga ang strategic testing sa mga barangay magsugod sa Lunes, Mayo 4, hangtod sa Mayo 15 o sa 20.