Gidayeg ni Police Regional Office 7, Regional Director, Police Brigadier General Redrico A. Maranan, ang kalampusan sa mga kapulisan sa pagdakop ug pagpuhag sa mga grupo nga naggamit og armas alang sa krimen sa Central Visayas.
Niadtong Marso 21, 2025, usa ka dako nga gunrunning syndicate sa Barangay Suba, Danao City, ang napahunong sa operasyon sa Regional Special Project Unit (RSPU7), diin tulo ka miyembro ang nadakpan. Lima ka adlaw human niini, laing operasyon sa Danao City Police Station sa Barangay Cahungan ang nakumpiskar og lima ka .45 caliber pistols, usa ka 9mm nga walay assembly, usa ka KG9 machine pistol, ug ubang parte sa armas.
Tungod sa malampusong operasyon, napadayon ang follow-up operations nga miresulta sa pag-neutralize sa 13 ka gun-for-hire groups nga pareho og tinubdan sa armas—mga ilegal nga manghimuay og pusil.
Sa Abril 25, ang CIDG Cebu misikop usab og usa ka nailhang tigbaligya og ilegal nga armas sa Barangay Cahumayan. Nakuha gikan niya ang tulo ka .45 caliber pistols, usa ka .38 revolver, mga parte sa pusil, ug daghang bala.
Sa samang adlawa, ang RSPU7 nakadakop usab sa labing gipangita nga suspek sa tulis nga nalambigit sa ₱14 milyon nga robbery sa Oro Sugbo Jewelry Shop kaniadtong Nobyembre 25, 2023. Nadakpan uban ang usa ka Eagle Tac-II .45 caliber pistol, usa ka granada (Frag MK2), ug daghang bala.
Sa kinatibuk-an, 47 ka suspek ang nadakpan, lakip na ang 7 ka lider sa mga sindikato, ug 358 ka pusil, 968 ka bala, ug 2 ka eksplosibo ang nakumpiskar—kadaghanan nakalapas sa COMELEC gun ban.
Tungod sa padayon nga operasyon, ang PRO7 nakatala og 27.54% nga pagkunhod sa mga focus crimes ug 32% nga pagnaug sa mga pagpamusil gikan Enero 1 hangtod Abril 25, 2025, kung ikumpara sa parehas nga yugto sa miaging tuig.
Gulauman nga magpadayon ang ilang kampanya batok armas ug krimen hangtod matapos ang election period, uban sa hugot nga checkpoint, surveillance, ug tabang sa katawhan.
Source: PRO7- PIO
I via Renante Socia Lada
#rpndykccebu